Reyndi að smygla rítalíni og rívotríli á hraunið

Kona var handtekin á Litla-Hrauni vegna gruns um að ætla að smygla lyfjum til fanga í fangelsinu í síðustu viku. Hún hafði innan klæða um 200 töflur af rítalíni og rívotríli sem hún hafði framvísað til fangavarðar rétt áður en lögreglumenn komu á staðinn.

Þá var tilkynnt um innbrot í tvo sumarbústaði í Heiðabyggð í Hrunamannahreppi í síðustu viku. Úr öðrum bústaðnum var stolið hljómflutningstækjum en einskis var saknað úr hinum. Talið er að brotist hafi verið inn í bústaðina aðfaranótt mánudags eða þriðjudags en lögreglan á Selfossi rannsakar málið.

Maður var svo kærður á Selfossi fyrir að brjóta rúðu í fólksbíl. Hann reiddist er honum var meinað um far og brást við með því að setja hnefann í hliðarrúðu bílsins.