Borgarar njóti sólar við vegg Tollhússins

Gísli Marteinn Baldursson og Hildur Sverrisdóttir, fulltrúar Sjálfstæðisflokksins í umhverfis- og samgönguráði Reykjavíkur, leggja til að bílastæðin sunnan við Tollhúsið í Tryggvagötu verði færð úr sólinni og í skuggann hinu megin götunnar.

Hugmyndin kviknaði hjá Gísla Marteini og Hildi þegar Hilmar Þór Björnsson arkitekt dró fram á bloggsíðu sinni tillögu frá kollegum sínum Stefáni Erni Stefánssyni og Reyni Vilhjálmssyni úr samkeppni um Listasafn Reykjavíkur frá árinu 1997. Þegar bílastæði eru farin á samkvæmt tillögunni að stækka stéttina framan við Tollhúsið og setja þar niður bekki svo borgarbúar geti átt notalega stund á sólríkum dögum.

Stefán Már segir að hugmynd þeirra Reynis um flutning bílastæðanna hafi á sínum tíma tengst því að þeir vildu hafa inngang í listasafnið að austanverðu. „Ég held að það sé mjög áhugavert að taka þetta upp til skoðunar í sambandi við tengingar miðbæjarins við Tónlistarhúsið og gömlu höfnina,“ segir Stefán um endurvakningu hinnar gömlu hugmyndar. Hann bendir á að breytingin geti einnig tengst áætlunum sem uppi séu um stíga meðfram höfninni allt vestur á Granda.

„Á gangstéttinni við Tollhúsið nýtur sólar ákaflega vel, húsið veitir skjól fyrir norðanáttinni sem skapar svipaðar aðstæður og við Kaffi París. Þarna getur verið sól og hiti, þótt norðannæðingur kæli aðra hluta miðborgarinnar. Bílarnir munu ekkert kvarta þótt þeir þurfi að standa í skugganum,“ segir Gísli Marteinn meðal annars á bloggsíðu sinni um tillöguna.

„Allir staðir í bænum þar sem fer saman sól og skjól verða mjög eftirsóttir, til dæmis við Austurvöll og í Austurstræti og þannig getur það líka orðið þarna við mósaíkverkið hennar Gerðar Helgadóttur. Fyrir utan hvað það er sjálfsagt og eðlilegt að gera þessu flotta listaverki hennar svolítinn sóma – þannig að það sé hægt að horfa á það almennilega,“ segir Stefán Örn Stefánsson.

gar@frettabladid.is