Sigurður Ragnar: Besta ár landsliðsins frá upphafi

„Þetta var frekar öruggt. Við spiluðum frábæran leik fyrir utan fyrstu tíu mínútur leiksins. Spiluðum vel, sköpuðum fullt af færum og allt eins og það á að vera,“ sagði hamingjusamur þjálfari kvennalandsliðsins, Sigurður Ragnar Eyjólfsson, eftir 0-2 sigur á Norður-Írum í Belfast í gær.

Stelpurnar okkar ljúka því góðu ári með sigri og eru á toppi síns riðils í undankeppni EM. Þó svo að íslenska liðið hafi ráðið lögum og lofum á vellinum í gær tók það 39 mínútur að brjóta heimamenn niður.

„Þær eru virkilega baráttuglaðar og múruðu upp fyrir utan markið hjá sér. Það er erfitt að brjóta slíkt lið niður. Færin komu samt og mörkin voru fín. Það skiluðu allar sínu í þessum leik og það er ekki oft þannig að allir leikmenn eru góðir. Ég tók engan leikmann af velli af því að hann var slakur. Eingöngu til að gefa öðrum tækifæri,“ sagði Sigurður sem hefði viljað fá fleiri mörk.

„Sigurinn var síst of stór miðað við færin sem við fengum í leiknum. Ég var samt ánægður að fá mark úr föstu leikatriði því við höfum saknað Eddu svolítið þar. Þetta var virkilega góður sigur og Þóra þurfti aðeins að verja einu sinni í leiknum. Það segir sína sögu um ógnina frá þeim. Við áttum allan leikinn og þetta var aldrei í neinni hættu. Það var samt gott að fá mörkin fyrir hlé og það létti á okkur. Eftir það fórum við að spila enn betur.“

Sigurður Ragnar segir þetta vera viðeigandi endi á ári sem sé einstakt í sögu íslenskrar kvennaknattspyrnu.

„Það er frábært að toppa með þessum sigri. Við erum búnar að vinna fjórar þjóðir á þessu ári sem eru hærra skrifaðar en við og eina tapið er gegn besta liði heims. Við erum í fínni stöðu í riðlinum og þetta er líklega besta ár kvennalandsliðsins frá upphafi. Það er ekki yfir neinu að kvarta í þessum efnum nema leiknum gegn Belgíu. Við erum engu að síður á toppnum og ráðum okkar örlögum.

Ég er virkilega ánægður með stelpurnar og gaman að sjá hvað við eigum orðið marga frábæra einstaklinga líka. Við eigum marga leikmenn í fremstu röð og aðrar eru að stíga enn betur upp.“