Leita að olíu á Drekasvæðinu úr flugvél

Norðmenn og Íslendingar hafa ákveðið að standa saman að flugsegulmælingum á Drekasvæðinu í haust. Niðurstöður mælinganna verða eitt af lykilatriðum við mat á olíulíkum á svæðinu.

Greint er frá málinu á heimasíðu Orkustofnunar, sem stendur að flugsegulmælingunum ásamt Norsku jarðfræðistofnuninni og Olíustofnun Noregs. Flugvél búin sérstökum rannsóknabúnaði mun í haust fljúga fram og til baka yfir 64 þúsund ferkílómetra hafsvæði austur af landinu, á Drekasvæðinu, en einnig innan norskrar lögsögu.

Gögnin sem fást úr mælingunum munu gera það mögulegt að kortleggja heildarreksögu Jan Mayen meginlandsflísarinnar. Jarðeðlisfræðileg túlkun á gögnunum mun einnig auðvelda ákvarðanir á tímasetningum atburðarrásar gliðnunar Drekasvæðisins og nærliggjandi svæða. Segir Orkustofnun jafnframt að kortlagning á mörkum úthafs og meginlandsskorpu, sem verði hluti af niðurstöðum mælinganna, sé eitt af lykilatriðum við mat á líkum á olíu á svæðinu.