Epli og appelsínur - bréf Jóhönnu birt í heild sinni

Jóhanna Sigurðardóttir segir Ríkisendurskoðun vera að bera saman epli og appelsínur. Þetta kemur fram í bréfi hennar til ríkisendurskoðunar um rannsókn á svörum hennar við fyrirspurn um kostnað ráðuneyta við aðkeypta þjónustu frá félagsvísindasviði Háskóla Íslands.

„Má segja að Ríkisendurskoðun sé með þessu að bera saman epli og appelsínu svo notað sé þekkt máltæki. Ekki þarf að efa að Ríkisendurskoðun muni greina muninn á svo ólíkum hlutum," segir Jóhanna meðal annars í bréfi sínu.

Sveinn Arason, ríkisendurskoðandi, segir fátítt að bréf af þessu tagi berist stofnuninni. „Ég renndi nú í gegnum þetta bréf og síðan var það sett inn í skjalasafnið og verður þar." Spurður hvort bréfið muni hafa áhrif á vinnu stofnunarinnar segir Sveinn. „Við munum bara vinna þetta eftir okkar höfði."

Vísir birtir bréf Jóhönnu til Ríkisendurskoðunar í heild sinni með þessari frétt.

Forsaga málsins er sú að þingmenn beindu fyrirspurn til forsætisráðherra um kostnað ráðuneyta við aðkeypta þjónustu, ráðgjöf og sérverkefni starfsmanna félagsvísindasviðs Háskóla Íslands.

Jóhanna Sigurðardóttir gerði grein fyrir þessu í þinginu en Guðlaugur Þór Þórðarson, þingmaður Sjálfstæðisflokksins, fullyrti að svör ráðherra væru röng, enda var misræmi á milli svara forsætisráðherra fyrir hönd allra ráðuneyta og svörum annarra ráðherra.

Með vísan til þriðju greinar laga um ríkisendurskoðun ákvað forsætisnefnd Alþingis að senda svör ráðherra til ríkisendurskoðunar. Vegna þeirrar ákvörðunar hefur Jóhanna nú sent ríkisendurskoðun bréf.

Þar fullyrðir Jóhanna að hún hafi engum upplýsingum leynt fyrir þinginu. Í svari sínu hafi hún einfaldlega fundið upplýsingar úr bókhaldi ráðuneytanna og miðlað þeim áfram til Alþingis. Þá segir í bréfinu að það sé í besta falli kjánalegt að saka forsætisráðherra og nokkra tugi starfsmanna ráðuneytanna um að leyna upplýsingum.

Þá bendir Jóhanna á að í svari sínu í þinginu hafi hún ekki talið með tímabundin störf en í kröfu forsætisnefndar um rannsókn á málinu sé farið fram á að þau verði einnig talin með. Þannig sé verið að bera saman epli og appelsínur. Þannig sé mikilvægt að ríkisendurskoðun endurskoði svar forsætisráðherra á sömu forsendum og það var undirbúið og veitt.