Heimsóknir á söfn tvöfaldast

Heildarfjöldi safngesta hefur nærri því tvöfaldast frá árinu 1995. Samkvæmt tölum Hagstofunnar var áætluð aðsókn að söfnum og tengdri starfsemi á síðasta ári ríflega 1,6 milljón gesta en þeir voru 829 þúsund árið 1995.

Aðsókn að söfnum og skyldri starfsemi er langsamlega mest á höfuðborgarsvæði, eða um 950 þúsund gestir, sem samsvarar um 59 prósent af fjölda gesta safna á síðasta ári. Aðsókn að söfnum og sýningum í öðrum landshlutum er mun minni.

Sýningargestir í fyrra voru flestir að söguminjasöfnum ýmis konar, að byggðasöfnum undanskildum, eða ríflega hálf milljón. Aðsókn að listasöfnum var litlu minni, eða 457 þúsund. Aðsókn að öðrum söfnum og sýningum var umtalsvert minni.

Frá aldamótum hefur gestum safna og skyldrar starfsemi fjölgað jafnt og þétt eftir að hafa staðið að miklu leyti í stað á seinni hluta síðasta áratugar 20. aldar. Svipuðu máli gegnir um fjölda safna og sýningarstaða. Ætla má að aukin aðsókn gesta að söfnum og skyldri starfsemi standi í beinu sambandi við aukið framboð sýningarstaða, aukna fjölbreytni sýninga og almennt fjölþættari starfsemi safna, sem og stórauknum ferðamannastraumi til og um landið.

Tölur Hagstofunnar um starfsemi safna og skyldrar starfsemi taka til safna, setra, safnvísa, fiskasafna, dýragarða og grasagarða, sem og skyldra sýninga opnum almenningi sem veita upplýsingar um árlegan fjölda gesta.