Fundu kannabisplöntur og haglabyssu í Þorlákshöfn

Lögreglan á Selfossi gerði húsleit í Þorlákshöfn á föstudag vegna gruns um kannabisræktun. Sú var raunin því lögreglumenn fundu þar á sjötta tug kanabisplantna sem voru í ræktun. Þær voru á mismunandi þroskastigi. Í tilkynningu frá lögreglu segir að hald hafi verið lagt á plönturnar og tilheyrandi búnað.

Þá segir að húsráðandi hafi verið handtekinn vegna málsins og viðurkenndi hann brotið. Auk þess fannst haglabyssa sem hinn handtekni var ekki skráður fyrir og tók lögreglan hana því í sína vörslu.