Sjalfboðaliðar aðstoða börn við heimanám og lesa fyrir aldraða

Einn af mörgum sjálfboðaliðum Rauða krossins segir það hafa gefið sér tilgang að sinna starfinu. Hann aðstoðar í hverri viku börn við heimanám og les úr bókum fyrir aldraða.

Ólafur Ragnar Grímsson, forseti Íslands, heimsótti í gær ungmenni hjá Kópavogsdeild Rauðakrossins. Með heimsókninni hófst sérstök vika Rauða krossins, sem tileinkuð er sjálfboðaliðum.

Einn af hverjum hundrað landsmönnum eru sjálfboðaliðar hjá Rauða krossinum. Verkefnin sem þeir sinna eru fjölbreytt. Svo sem fatasöfnun og neyðaraðstoð.

Jón Sigurgeirsson er einn af sjálfboðaliðunum. Í hverri viku tekur hann þátt í því að aðstoða grunnskólabörn við heimalærdóm á bókasöfnum í höfuðborginni og svo les hann upp úr bókum fyrir aldraða. Rúm tvö ár eru síðan að hann gerðist sjálfboðaliði.

„Ég hef átt við andleg veikindi að stríða og hef ekki verið á vinnumarkaði um nokkurt skeið. Ég byrjaði á því að læra ljósmyndun til þess að fylla upp í tímann og svo kom tómarúm og ég fann þetta af einhverri tilviljun, maður er leiddur í lífinu,“ segir Jón.

Hann segir að sjálfboðaliðastarfið hafi hjálpað honum að takast á við veikindi sín og það að vera ekki í vinnu.

„Það var einhver sem sagði að þú ert svo góður að gera þetta en ég geri þetta algjörlega fyrir sjálfan mig. Þetta gefur mér óhemjulega mikið. Þetta gefur mér reglu í lífið. Þetta gefur mér tilgang og tilfinningu fyrir því að ég sé að gera gagn,“ bætir Jón við.