Megn óánægja á meðal frjálslyndra jafnaðarmanna

Megn óánægja ríkir á meðal frjálslyndra jafnaðarmanna, það er að segja þeirra hægrisinnuðustu í Samfylkingunni, með þá ákvörðun leiðtoga ríkisstjórnarinnar, þeirra Jóhönnu Sigurðardóttur og Steingríms J. Sigfússonar, að víkja Árna Páli Árnasyni úr embætti efnahags- og viðskiptaráðherra.

Félag frjálslyndra jafnaðarmanna, sem á fulltrúa í flokksstjórn Samfylkingarinnar, hittist í gær og fór yfir stöðu mála. Þar var Árni Páll Árnason sjálfur um stund. Fundurinn var ekki boðaður sérstaklega til að ræða stöðuna, heldur var um að ræða jólaboð sem hafði verið fyrirfram ákveðið og tilviljun ein réð því að það bar upp á sama dag og fréttir af breytingum í ríkisstjórninni bárust fjölmiðlum. Þeir félagar í Félagi frjálslyndra jafnaðarmanna sem Vísir hefur talað við vilja ekkert láta uppi um hvað fór fram á fundinum, en segja að beðið sé eftir því hvað Jóhanna Sigurðardóttir, formaður Samfylkingarinnar, muni segja á flokkstjórnarfundinum í dag.

Á meðal þeirra sem aðild eiga að Félagi frjálslyndra jafnaðarmanna er Margrét Björnsdóttir, formaður framkvæmdastjórnar Samfylkingarinnar, Vilhjálmur Þorsteinsson, gjaldkeri Samfylkingarinnar, auk fleiri manna.

Samkvæmt heimildum Vísis er sú ákvörðun að víkja Árna Páli ekki síst til komin vegna samskiptaörðugleika Steingríms J. Sigfússonar fjármálaráðherra og Árna Páls í ríkisstjórn.