Oddný verður nýr fjármálaráðherra

Oddný G. Harðardóttir, þingflokksformaður Samfylkingarinnar, verður fjármálaráðherra. Þetta hefur fréttastofa eftir heimildum af þingflokksfundi Samfylkingarinnar.

Miklar hrókeringar eiga sér nú stað í ríkisstjórninni og stendur til að fækka ráðherrum um tvo. Nú standa yfir þingflokksfundir hjá stjórnarflokkunum, VG og Samfylkingarinnar.

Þingmenn flokkanna vildu ekkert tjá sig við fréttamann Stöðvar 2 þegar þeir gengu á fundinn síðdegis í dag. Jóhanna Sigurðardóttir, forsætisráðherra, sagði þó að breytingarnar væru ekki pólitískar hreinsanir.

Jón Bjarnason er að hætta sem sjávarútvegs- og landbúnaðarráðherra og Árni Páll Árnason hættir sem efnahags- og viðskiptaráðherra.

Stærstu tíðindi dagsins eru hins vegar þau að Steingrímur J. Sigfússon mun í fyllingu tímans taka við verkefnum frá báðum ráðuneytum í nýju atvinnuvegaráðuneyti og Samfylkingin fær fjármálaráðuneytið, eins og áður segir.