Veðurstofan varar við vondu veðri á aðfangadag

Veðurstofa Íslands vekur athygli á að spáð er slæmu veðri um allt land á aðfangadag jóla.

Lægð er spáð upp að landinu í nótt. Hún dýpkar hratt og veldur sunnan hvassviðri og rigningu sunnantil snemma morguns en slyddu eða snjókomu til fjalla. Á Vestfjörðum er spáð norðan hvassviðri og snjókomu fram yfir hádegi.

Lægðin gengur norðaustur yfir land og síðdegis er spáð norðvestan stormi með snjókomu á austurhluta landsins. Vindhraði gæti þar farið upp í 23-28 m/s og hviður yfir 40 m/s um og eftir kl. 18.

Landsmönnum er bent á að athuga vel bæði færð, veður og veðurspá áður en þeir leggja í ferðalög á milli landshluta því færð spillist mjög fljótt í veðri sem þessu.

Ljóst er að veður verður slæmt í öllum landshlutum á mismunandi tíma á morgun, og nauðsynlegt að gæta varúðar.