Tóku kannabisplöntur og ofskynjunarsveppi

Lögreglan gerði húsleit á Akureyri í morgun þar sem hald var lagt á 25 kannabisplöntur auk tækja til ræktunar hjá manni á þrítugsaldri. Þá gerði lögreglan jafnframt tvær húsleitir í íbúð og iðnaðarhúsnæði á Akureyri að undangengnum úrskurði Héraðsdóm norðurlands eystra. Þar lagði lögreglan hald á 10 grömm af kannabisefnum og nokkurt magn af ofskynjunarsveppum.

Í gærdag handtók lögreglan á Akureyri svo jafnframt mann um tvítugt grunaðan um akstur undir áhrifum ólöglegra fíkniefna. Í bíl hans fannst smáræði af kannabisefnum og í framhaldinu var gerð húsleit á heimili hans  þar sem lagt var hald á rúmlega 50 grömm af kannabisefnum til viðbótar auk 200 þúsund króna í peningum sem talið er vera ágóði af fíkniefnasölu.