Góður dagur fyrir skíðaíþróttir - snjókomu spáð áfram

Unnendur skíðaíþróttarinnar á höfuðborgarsvæðinu geta tekið gleði sína á ný því samkvæmt upplýsingum úr Bláfjöllum verður opið í fjallinu frá klukkan tíu til fimm í dag. Þar er frábært veður og einstaklega gott færi í troðnum brautum. Örlítinn snjó lagði yfir brekkurnar í gær og í nótt sem gerir þetta enn betra að sögn umsjónarmanns svæðisins.

Þá er minnt á skíðaleigu og veitingasölu á staðnum en rútuferðir verða frá Olís í Mjödd klukkan 12:40. Þá er einnig opið í Hlíðarfjalli á Akureyri til klukkan fjögur í dag. Í tilkynningu þaðan segir að Strompur, Fjarkinn, Skálabraut, Auður og Töfrateppið verði opið sem og göngubraut. klukkan hálf níu í morgun var norð norðvestan fjórir metrar á sekúndu og mínu sex gráður.

kyggni gott. Þá verður opið á milli tólf og sextán á Skíðasvæðinu í Tindastóli. Mikill og fallegur púðursnjór, hægviðri og frost mínus fimm stig. Þá er minnt á að göngubrautin sé troðin.

Ábendingar frá veðurfræðingi: Spáð er éljum eða snjókomu meira og minna á Suðurnesjum og á Höfuðborgarsvæðinu fram eftir degi, en vindur yfirleitt hægur og því ekki skafrenningur að ráði.

Færð og aðstæður frá Vegagerðinni:

Það eru hálkublettir á Hellisheiði, Sandskeiði og í Þrengslum. Á Suðurlandi er hálka eða hálkublettir. Hálka og éljagangur er á Suðurnesjum og eins á Suðurstrandarvegi.

Á Vesturlandi er snjóþekja og hálka og víða éljagangur. Hálka og snjóþekja er á flestum vegum á Vestfjörðum.

Á Norðurlandi er víða snjóþekja eða hálka þá er þæfingur í Kelduhverfi og um Hófaskarð. Á Austur- og Suðausturlandi er hálka.

Svo varar Vegagerðin og Náttúrustofa Austurlands vegfarendur við umferð hreindýra á Suðausturlandi.