Dagbókarbrot Páls Óskars: Kóleru útrýmt með hjálp orkumesta stuðboltans

Dagbókarbrot frá Páli Óskari Hjálmtýssyni í Síerra Leóne birtast þessa dagana á Vísi, eitt á dag, fram að söfnunar- og skemmtiþætti UNICEF, Barnahjálp Sameinuðu þjóðanna, sem sýndur verður á föstudag, á degi rauða nefsins. Dagur rauða nefsins verður í opinni útsendingu á Stöð 2 og hér á Vísi.



Hér er ég staddur í pínulitlu þorpi inni í miðjum frumskógi í Síerra Leóne í vesturhluta Afríku.  Þorpið er svo lítið að nær allir þorpsbúarnir rúmast með mér á þessari mynd.

Ég fékk að vera vitni að litlu kraftaverki í þessu þorpi.  Fyrir rúmu ári síðan var mjög algengt að fólkið þarna, og sérstaklega börnin, veiktust af niðurgangspestum og kóleru.  Algengt var að börnin létu lífið af þessum orsökum.  Þegar starfsfólk UNICEF mætti á svæðið til að kanna rót sjúkdómsins, komust þau að því að í öllu þorpinu var engin salernis- eða hreinlætisaðstaða.  Of algengt var að fólkið í þorpinu gerði sín stykki nálægt drykkjarvatni, sem þau drukku síðan eða notuðu í matargerð og veiktust.

Starfsfólk UNICEF einfaldlega kenndi orkumesta stuðboltanum í þorpinu að búa til salerni sem aðrir gátu svo leikið eftir.  Þetta eru útikamrar sem eru búnir til úr hráefninu sem eru allt í kringum þau, bambus, leir og grjóti.  Einnig var fólkinu, sér í lagi börnunum, uppálagt að þvo sér um hendurnar eftir ferðir á kamarinn.  Þar sem engin sápa er til í þorpinu, nota þau ösku og vatn í staðinn – heimilisráð sem svínvirkar.

Og afleiðingarnar létu ekki á sér standa.  Á aðeins einu ári – eftir að fyrsti útikamarinn var reistur – er búið að útrýma kóleru og niðurgangspestum úr þessu þorpi.

Allir þorpsbúar tóku UNICEF starfsfólkinu fagnandi, þökkuðu þeim lífgjöfina.  Og allir voru til í að vera með mér á mynd.  Þetta er sönnun þess að þekking, upplýsingar, menntun og fræðsla skiptir svo gífurlegu máli. UNICEF vinnur hörðum höndum að þessu. Þetta er enn ein ástæðan fyrir því að ég er heimsforeldri.  Börn þurfa ekki að deyja af einföldum orsökum sem auðveldlega má koma í veg fyrir.

Þú getur auðveldlega hjálpað líka með því að gerast heimsforeldri á unicef.is.

- Páll Óskar