Samstarfsmenn á X-inu: Hemmi var týpan sem maður faðmaði

„Þessi litla útvarpsstöð verður aldrei aftur söm án Hemma sem var einhver glaðlyndasti og hjálpsamasti samstarfsmaður og vinur sem við höfum átt," segir í kveðju frá samstarfsmönnum Hermanns Fannars Valgarðssonar á X-inu 977.

Hermann Fannar var bráðkvaddur í fyrrakvöld en hann var 31 árs gamall. Í kveðjunni, sem birt er á Facebook-síðu X-ins. „Við munum alltaf minnast Hemma sem hressa gaursins sem var alltaf brosandi og lýsti upp allt í kring um sig hvar sem hann kom ýmist með skemmtilegum frösum sínum eða bara þeirri óþrjótandi gleði sem ávallt skein af honum.

Hemmi var ekki týpan sem maður heilsaði með handabandi, Hemmi var týpan sem maður tók utan um og faðmaði í hvert sinn sem maður hitti hann. Við verðum ævinlega þakklátir fyrir að hafa kynnst honum og kveðjum hann með sorg í hjarta," segir í kveðjunni.

Facebooksíða X-ins 977