Davíð Oddsson sló á létta strengi

Davíð Oddsson sló á létta strengi í óvæntri ræðu sinni á Landsfundi Sjálfstæðismanna í dag. Þar sagði hann meðal annars skemmtisögu af því þegar eldri hjón horfðu á Alþingi í sjónvarpinu. Þá á Steingrímur J. Sigfússon að hafa verið að halda ræðu, þar sem hann sagði meðal annars að hann væri ekki að ljúga, heldur segja sannleikann, eins og hann hafði tamið sér í gegnum tíðina.

„Sú gamla hafði þá á orði að áramótaskaupið væri heldur snemma á ferðinni í ár," sagði Davíð og uppskar hlátur landsfundargesta.

Þá sagði Davíð einnig að aðferðafræði norrænu velferðarstjórnarinnar væri í raun sú að landsmenn tækju norrænu til annarra velferðarlanda. Hann sagði einnig að hlutverk ríkisstjórna væri að leiða og skapa. Ekki skapa leiða.

En Davíð var líka alvarlegur á fundinum. Hann vitnaði í ljóð eftir Hannes Hafstein og áréttaði að Ísland stæði á margan hátt betur eftir hrun en fjölmörg Evrópulönd.

Hann sagði þrennt standa upp úr. Það að Íslendingar hefðu greitt upp allar sínar skuldir og tekist á við hrunið skuldlaust. Það að hafa ekki greitt skuldir óreiðumanna. Og svo að við höfum okkar eigin mynt.

Hann segir þessi þrjú atriði hafa forðað landinu frá því að fá lénsherra frá ESB yfir okkur, eins og hann orðaði það.

Davíð sagði í ræðu sinni að þrátt fyrir það forskot sem fyrrtalin atriði hafi veitt þjóðinni í erfiðri glímu við efnahagshrunið, þá hafi núverandi ríkisstjórn, „eftir að ríkisstjórninni skolaði inn á Alþingi með trumbuslætti búsáhalda," glutraði niður öðrum tækifærum, eins og Davíð orðaði það.

Ræður frambjóðanda til formanns og varaformanns Sjálfstæðisflokksins hefjast klukkan fjögur. Hægt er að horfa á ræðurnar beint hér.