Ekkert bendir til þess að árásin hafi átt sér stað

Tveir erlendir ofbeldismenn ganga ekki lausir í Vestmannaeyjum og þurfa bæjarbúar ekkert að óttast, segir varðstjóri hjá lögreglunni í bænum.

Á sunnudaginn var sagt frá meintri árás tveggja erlendra karlmanna á stúlku um tvítugt á Hásteinsvegi. Í dagbók lögreglu var sagt frá því að stúlkan hafi komið á lögreglustöðina um helgina og sagt að mennirnir hefðu áreitt sig kynferðislega utan við hús í bænum. Þeir hafi meðal annars rifið sokkabuxur en hún lýsti mönnunum ítarlega fyrir lögreglu.

Varðstjóri segir að við frekari rannsókn bendir ekkert til þess að árásin hafi átt sér stað. En kurr var meðal bæjarbúa eftir að fréttir af árásinni bárust. Málið er í rannsókn og ekki er hægt að veita frekari upplýsingar að svo stöddu.