Vill lengja fæðingarorlofið í tólf mánuði og auka greiðslur

Jóhanna Sigurðardóttir, forsætisráðherra, vill lengja fæðingarorlofið í tólf mánuði og auka greiðslur til foreldra í fæðingarorlofi. Hámarksgreiðslur Fæðingarorlofssjóðs hafa lækkað um 235 þúsund krónur á meðan hún hefur setið í ríkisstjórn.

Sérstök aðgerðaráætlun í málefnum ungs fólks var samþykkt á landsfundi Samfylkingarinnar um helgina. Þar er gert ráð fyrir að fæðingarorlof verði lengt í 12 mánuði og Fæðingarorlofssjóður styrktur þannig að unnt sé að hækka hámaraksgreiðslur sjóðsins svo að þær endurspegli meðallaun í landinu.

„Það er núna ásetningur okkar að breyta hér um og snúa hér við blaði. Bæði að auka greiðslurnar til einstaklinga, fæðingarorlofsgreiðslurnar, í svona skrefum. Síðan sé ég fyrir mér að við getum lögfest lengingu á fæðingarorlofinu en það myndi ekki taka gildi fyrr en að við sjáum jafnvægi í ríkisfjármálum sem þá yrði það ekki fyrr en hugsanlega ekki fyrr en á árinu 2013 eða 2014," segir Jóhanna.

Á árunum 2008 til 2010 lækkuðu hámarksgreiðslur sjóðsins úr 535 þúsund krónum í 300 þúsund krónur eða um 235 þúsund krónur. Á sama tíma sat Jóhanna í ríkisstjórn.

„Hrunið skall á okkur og þá varð að taka því viðfangsefni og veita það aðhald sem nauðsynlegt var í ríkisfjármálum og það kom því miður niður á fæðingarorlofssjóði eins og og öðru. En það er ásettningur okkar að snúa þeirra þróun við. Það er mjög mikilvægt að geta horft til framtíðar í því eins og mörgu öðru þar sem við erum að sjá miklu bjartari tíma framundan."

Jóhanna vonast til að tólf mánaða fæðingarorlof geti orði að veruleika á næsta kjörtímabili sem hefst að öllu jöfnu 2013.

„Ég sé fyrir mér að við gætum lögfest það en ég sé ekki fyrir mér að það komi til framkvæmda fyrr en á næsta kjörtímabili lengingin en ég vona að við getum bætt eitthvað í greiðslurnar," segir hún að lokum.