Gefa út 20 íslenskar hljóðbækur fyrir jólin

Nýtt útgáfufélag, Skynjun, hefur verið stofnað utan um framleiðslu hljóðbóka sem verða fáanlegar á vefnum Tónlist.is. Formleg opnun hljóðbókasvæðis Tónlist.is, sem er á slóðinni tonlist.is/audiobook, er 1. nóvember en nú þegar eru nokkrir titlar fáanlegir.

Skynjun leggur áherslu á góðan upplestur bókanna og segir í tilkynningu frá útgáfufélaginu að raddblær leikarans bæti við upplifunina af lestri góðra bóka. Þá er sú nýbreytni boðuð að vinsælir titlar koma út sem hljóðbók samhliða prentuðum útgáfum.

Skynjun áætlar að gefa út 20 titla fyrir þessi jól. Meðal þeirra eru Einvígið eftir Arnald Indriðason í lestri Ingvars E. Sigurðssonar, Brakið eftir Yrsu Sigurðardóttur í lestri Elvu Óskar Ólafsdóttur, Málverkið eftir Ólaf Jóhann Ólafsson í lestri Hönnu Maríu Karlsdóttur, Trúir þú á töfra eftir Vigdísi Grímsdóttur í lestri Unnar Aspar Stefánsdóttur og Ekki líta undan - saga Guðrúnar Ebbu dóttur Ólafs Skúlasonar biskups í lestri Guðrúnar Ebbu sjálfrar.

Hægt er að kynna sér útgáfufélagið Skynjun nánar á Facebook-síðu þess, facebook.com/skynjun. Þar stendur yfir opnunarleikur þar sem gefin er ein bók á dag og þann 4. nóvember hlýtur einn Facebook-vinur útgáfunnar iPod touch með allri haustútgáfu hennar.