Stikla úr mynd Baltasars nýtur gríðarlegra vinsælda

Kynningarstikla fyrir kvikmyndina Contraband í leikstjórn Baltasars Kormáks er vinsælasta myndbandið á YouTube þessa stundina. Myndin kostaði 25 milljónir dollara í framleiðslu og skartar stórleikurum á borð við Mark Wahlberg.

Contraband er endurgerð á íslensku myndinni Reykjavík Rotterdam sem Baltasar framleiddi og lék í. Stikla myndarinnar var frumsýnd í síðustu viku og hafa nú þegar tæpar fimm milljónir skoðað hana á YouTube og er myndbandið sem stendur það vinsælasta á vefnum sem þykir mjög óvenjulegt fyrir kvikmyndastiklu. „Þeir eru alveg í skýjunum með þetta Universal, ég hef náttúrulega bara gert myndir hérna heima og það eru fimmtíu  manns sem horfa á trailerinn og þú ert voða ánægður skiluru" segir Baltasar Kormákur leikstjóri myndarinnar.

Það er Universal Studios sem framleiðir myndina sem verður sýnd í 2-3 þúsund bíósölum bara í Bandaríkjunum auk dreifingar um allan heim en Baltasar er fyrsti Íslendingurinn sem leikstýrir fyrir bandarískt kvikmyndaver af þessarri stærðargráðu og segir hann það mjög breyttan heim. „En samt sem áður þá þegar það kemur að því að gera hluti, þá er þetta sami hlutur, það er alveg eins að vinna með Mark Wahlberg og Ingvari Sig. Þetta eru bara báðir leikarar og báðir mjög góðir."

Framleiðsla myndarinnar kostar Universal 25 milljónir dollara eða tæpa 3 milljarða króna og segir Baltasar það ekki vera háa upphæð. „Einn af þeim hlutum sem að þeir hafa verið svolítið imponeraðir yfir að þeim finnst hún líta út fyrir að vera miklu dýrari en hún kostaði."

Myndin verður frumsýnd 13.janúar í Bandaríkjunum og vonast Baltasar til að hún muni skapa honum tækifæri í þessum Hollywood heimi. „Mig langaði svona aðeins að spila í efstu deild og fá að keppa við stóru karlana og ég vona að hún opni það fyrir mér að ég geti haldið áfram og það hafa nú þegar mjög góð tilboð komið um áframhaldið hjá þeim aðilum sem eru að framleiða þessa mynd þannig þeir hljóta að vera nokkur sáttir með það sem ég gerði fyrir þá," segir Baltasar að lokum.