Almenningur klofinn í afstöðu til sjúkrahúsbyggingar

Skiptar skoðanir virðast vera á meðal almennings um fyrirhugaða byggingu sjúkrahúss við Hringbraut, en um helmingur þeirra sem tekur afstöðu til þess hvort framkvæmdin sé slæm ráðstöfun á skattfé telur svo vera. Könnunin var framkvæmd af MMR og tóku áttatíu prósent aðspurðra afstöðu í málinu.

51,1 prósent telur að framkvæmdin sé slæm ráðstöfun á skattfé en 48,9 prósent telja svo ekki vera. Spurt var: „Telur þú að bygging nýs hátæknisjúkrahúss sé góð ráðstöfun á skattfé?"

„Samkvæmt könnuninni var nokkur munur á afstöðu fólks til þess hvort bygging nýs hátæknisjúkrahúss væri góð ráðstöfun á skattfé eftir hópum,“ segir í tilkynningu frá MMR. „Af þeim sem tóku afstöðu voru konur jákvæðari gagnvart ráðstöfun skattfjár til byggingar nýs hátæknisjúkrahúss en karlar en 52,2% kvenna töldu byggingu nýs hátæknisjúkrahúss vera góða ráðstöfun á skattfé borið saman við 45,9% karla.“

Þá kemur fram að yngra fólk var einnig jákvæðara gagnvart því að bygging nýs hátæknisjúkrahúss væri góð ráðstöfun á skattfé en 60,9% yngsta hópsins taldi svo vera borið saman við 43,3% elsta aldurhópsins. Höfuðborgarbúar töldu frekar en fólk á landsbyggðinni að bygging nýs hátæknisjúkrahúss væri góð ráðstöfun á skattfé, eða 52,6% höfuðborgarbúa samanborið við 43,3% fólks á landsbyggðinni,“ segir einnig.

MMR leit einnig til stuðnings við stjórnmálaflokka og kom í ljós að stuðningur við framkvæmdina er mestur hjá þeim sem styðja stjórnarflokkana. 58,5% stuðningsfólks Vinstri grænna og 57,2% Samfylkingarfólks taldi málið af hinu góða „borið saman við 45,2% stuðningsfólks Framsóknarflokksins og 44,4 Sjálfstæðismanna.“