Heimsendir á morgun

Umfjöllun Íslands í dag um þáttaröðina Heimsenda. Ragnar Bragason leikstjóri segir frá frumsýningarfiðringnum og sýnd eru tvö atriði úr þættinum.

Öll sagan í þáttunum á sér stað á nokkrum dögum um og í kringum verslunarmannahelgina árið 1992 og inn í hana fléttast svo margar aðrar sögur.

„Heimsendir fjallar um afskekkta geðdeild úti á landi sem heitir Heimsendi, en er kölluð Heimsendir af þeim sem líta veröldina dekkri augum en aðrir. Á geðdeildinni er mikið úrval af áhugaverðu fólki, bæði vistmönnum og starfsfólki, og stundum er erfitt að greina mun á því hvort er hvað.

Inn í þessa kreðsu kemur nýr vistmaður, Einar, sem leikinn er af Halldóri Gylfasyni. Einar er allt annað en sáttur við að vera nauðungarvistaður á geðdeildinni eftir alvarlegt taugaáfall og byrjar að gera athugasemdir við starfshættina og umhverfið. Þessar athugasemdir Einars leiða aftur til byltingar á Heimsenda, þar sem vistmennirnir taka yfir hælið. Bókstaflega," útskýrði einn höfunda þáttanna, Jóhann Ævar Grímsson á dögunum.