Ástandið í þjóðfélaginu ekki næg ástæða til að fara á svig við lög

Ríkisendurskoðun hafnar því að slíkt neyðarástandi hafi ríkt í samfélaginu fram í mars á þessu ári, að réttlætanlegt hafi verið að víkja frá ákvæðum laga um opinber innkaup. Ríkislögreglustjóri segir að ógerlegt hafi verið að leita annað og hafnar því að hafa brotið lög.

Ríkisendurskoðun telur að Ríkislögreglustjóri hafi gerst brotlegur við lög um opinber innkaup þegar hann verslaði við fyrirtæki í eigu lögreglumanna eða aðila tengdum þeim fyrir rúmlega 91 milljón króna á þriggja ára tímabili án þess að leita tilboða.

Haraldur Johannessen Ríkislögreglustjóri hafnar því alfarið að hafa brotið lög um opinber innkaup. Hann bendir á að ástandið í þjóðfélaginu eftir bankahrun og í tengslum við Búsáhaldabyltinguna í janúar 2009 hafi verið þannig að snör handtök hafi þurft til að kaupa búnaðinn.

Hinsvegar fóru kaup embættisins á öðrum vörum en óeirðargasi og piparúða, af einu fyrirtækinu fram á tímabilinu maí til nóvember 2008, febrúar til nóvember 2009, janúar til desember 2010 og janúar til mars 2011, löngu eftir að hinni svokölluðu Búsáhaldabyltingu var lokið, en um sautján reikninga er að ræða.

Sveinn Arason Ríkisendurskoðandi sagði í samtali við fréttastofu í morgun að mat stofnunarinnar hefði ekki breyst frá því í gær. Stofnunin telji að ekki hafi ríkt slíkt ástand í samfélaginu að réttlætanlegt hafi verið að víkja frá ákvæðum laga um opinber innkaup í öllum þessum viðskiptum.

Að öðru leyti vildi hann lítið tjá sig um málið og sagði boltann nú vera hjá Innanríkisráðuneytinu. Ögmundur Jónasson innanríkisráðherra er staddur erlendis, og er ekki von á honum til landsins fyrr en um helgina.