Hópuppsagnir fyrirhugaðar hjá Heilsustofnun Hveragerðis

Starfsfólki Heilsustofnunarinnar í Hveragerði verður sagt upp stöfum ef þjónustusamningur stofnunarinnar við ríkið verður ekki endurnýjaður. Frá þessu var greint í frétt á RÚV fyrr í dag. Stofnunin er næststærsti vinnustaður Suðurlands, en þar vinna um 12% vinnuafls Hveragerðis. Hún er rekin af Náttúrulækningafélag Íslands samkvæmt þjónustusamningi við ríkið.

Samningsviðræður hafa undanfarið staðið milli ríkisins og stofnunarinnar. Framkvæmdastjóri heilsustofnunarinnar sagði á RÚV í dag að illa hefði gengið að halda sambandi við velferðarráðuneytið.

Forsvarsmenn Náttúrulækningafélags Íslands telja alþingismanninn Sigmund Erni Rúnarsson hafa sett viðræðurnar í heild sinni á hliðina með ummælum sem hann lét falla í viðtali í útvarpsþættinum Reykjavík síðdegis í gær. Sigmundur reifaði þar þá skoðun sína að ekki yrði gengið lengra í niðurskurði á grunnþjónustu samfélagsins, þar á meðal heilsugæslu. Svo lét hann eftirfarandi orð falla: 

„Við erum að skera niður í bráðnauðsynlegri þjónustu í heilbrigðiskerfinu á sama tíma og ríkið rekur til dæmis náttúrulækningahælið í Hveragerði. Er það eðlilegt? Á ríkið ekki fyrst og fremst að standa vörð um grunnþjónustuna í heilbrigðiskerfinu og láta aðra um hitt?"

Mikil óánægja ríkir í Hveragerði vegna ummælanna og menn telja að endurnýjun þjónustusamningsins muni ganga verr í kjölfar þeirra.

Velferðarráðuneytið sendi aftur á móti frá sér yfirlýsingu síðdegis í dag. Þar kemur fram að framlög til stofnunarinnar verði ekki skert umfram það sem fyrirhugað er hjá öðrum heilbrigðisstofnunum. Því veki furðu að stofnunin telji nauðsynlegt að grípa til hópuppsagna. Hins vegar ráði stofnunin auðvitað sjálf hvernig hún hagi starfsmannamálum sínum.

Að auki þvertekur ráðuneytið fyrir að samskipti milli þess og stofnunarinnar hafi gengið stirðlega.

Hér má hlusta á viðtal við Gunnlaug K. Jónsson, forseta Náttúrulækningafélags Íslands og Aldísi Hafsteinsdóttur bæjarstjóra í Hveragerði vegna málsins.