Síminn stoppar ekki hjá Guðmundi Steingríms

Undanfarin sólarhring hefur síminn ekki stoppað og pósti rignir inn. Þetta segir Guðmundur Steingrimsson, þingmaður Framsóknarflokksins, í pistli á vefsíðu sinni þar sem hann útskýrir úrsögn sína úr Framsóknarflokknum.

Hann hitti Sigmund Davíð Gunnlaugsson, formann flokksins, í dag til að gera grein fyrir afstöðu sinni. Guðmundur segir að nánast undantekningalaust fái hann stuðningsyfirlýsingar við þá hugmynd að nýtt afl þurfi á Íslandi til þess að vinna þessum hugsjónum fylgi og til þess að breyta stjórnmálunum. Margir hafi greinilega hugsað það sama.

„Ég hef því styrkst verulega í þeirri trú minni að úti í þjóðfélaginu - á meðal flokksbundinna einstaklinga í öllum flokkum og óflokksbundinna - er fullt af fólki sem deilir þessum skoðunum; fólk sem aðhyllist opin og uppbyggileg vinnubrögð, opið, óheft og óhrætt samfélag. Ég veit líka að það er til fólk sem er komið með nóg af tilgangslausu þrasi hefðbundinna stjórnmála, refskák, þröngsýni, undirtökum öfgaafla, úr sér genginni flokkstrú og gamaldags sérhagsmunagæslu. Fólk sem vill heiðarlega umræðu um grundvallarsýn fyrir frjálst og réttlátt íslenskt samfélag,“ segir Guðmundur Steingrímsson.