Átti við pólitíska skápahomma - ætlaði ekki að móðga neinn

„Kannski notaði ég vitlaus orð, en ég ætlaði að tala um pólitíska homma,“ útskýrði fjölmiðlamaðurinn Ingvi Hrafn Jónsson, fyrir félögunum í Reykjavík síðdegis í dag þegar hann var inntur eftir því hvað hann hafi eiginlega átt við þegar hann kallaði Guðmund Steingrímsson „framsóknarhomma“.

Samtökin ´78 sendu frá sér grein í dag og Vísir greindi frá. Þar sögðust þau ekki skilja fjölmiðlamanninn reynda, sem hefur starfað við fjölmiðla í áratugi. Þau báðu hann vinsamlegast um að skýra meiningu sína frekar.

„Það sem ég átti við var að Guðmundur hefði komið út úr pólitíska skápnum, því hann var ekki framsóknarmaður, hann var alltaf krati“ sagði Ingvi Hrafn sem ætlaði engan að móðga og bætir um betur og sagði í viðtalinu:

„Mér er andskotans sama hverja menn elska svo lengi sem þeir eru góðir starfsmenn og góðar manneskjur.

Ingvi Hrafn sagði síðan að það væri löngu tímabært að bjóða forsvarsmönnum samtakanna í þáttinn Hrafnaþing á ÍNN, og ræða stöðu samkynhneigðra á Íslandi.

Hægt er að nálgast viðtalið hér fyrir ofan.