Háski í háloftunum: Þrjár flugvélar komust í hann krappan í dag

Flugvél Delta þurfti að lenda á Keflavíkurflugvelli laust fyrir hádegi í dag vegna minniháttar bilunar. Samkvæmt upplýsingafulltrúar Isavia var enginn sérstakur viðbúnaður vegna lendingarinnar.

Vélin var á vegum Delta flugvélagsins og var að koma frá Kennedy flugvellinu en ferð þeirra var heitið til Kaupmannahafnar.

Þetta var því önnur flugvélin sem þurfti að lenda á Keflavíkurflugvelli í dag, en snemma í morgun nauðlenti farþegaþota með á annað hundrað farþega innanborðs, eftir að reykur gaus upp inn í vélinni.

Samhæfingarmiðstöð Ríkislögreglustjóra var virkjuð og tiltækt slökkvi- og sjúkralið sett í viðbragðsstöðu. Vélin lenti síðan heilu og höldnu klukkan tuttugu mínútur yfir fimm í morgun og var hættustiginu þá aflétt.

Þess má reyndar einnig geta að keimlíkt óhapp varð í morgun í Eyjafirði þegar lítil flugvél nauðlenti á Melagerðismelum. Mikill viðbúnaður var vegna óhappsins en flugmennirnir tilkynntu um að flugstjórnarklefinn hefði skyndilega fyllst af reyk.

Aðspurð sagði Hjördís Guðmundsdóttir,upplýsingafulltrúi Isavia, að það hefði verið óvanalega mikið að gera í dag. Óhöppin væru þó lítið annað en sjaldgæf tilviljun.

Því er óhætt að segja að nokkur háski hafi verið í háloftunum í dag.