Hálf milljón safnaðist í skákmaraþoni

Hálf milljón safnaðist á Skákmaraþoni íslenskra barna fyrir sveltandi börn í Sómalíu í gær en einnig verður teflt fyrir málstaðinn í dag. Alls hafa 30 milljónir safnast á styrktarreikning Rauða krossins frá upphafi söfnunar vegna hungursneyðar í Austur-Afríku.

Teflt verður óslitið í Ráðhúsi Reykjavíkur í dag. Tilgangur maraþonsins er að safna fé fyrir sveltandi börn í Sómalíu en allt söfnunarfé mun renna til Rauða krossins. „Það er gaman að sjá hversu margir hafa mætt hérna í morgun og tekið daginn snemma. Það gekk mjög vel í gær, við höfðum sett okkur það takmark að ná hálfri milljón, en það náðist næstum hálf milljón í gær," segir Stefán Bergsson, framkvæmdastjóri Skákakademíu Reykjavíkur.

Fólki er í sjálfvald sett hvað það borgar fyrir skákina, en þeir sem treysta sér ekki til að tefla sjálfir geta keypt skákmeistara á staðnum og fengið hann til að tefla fyrir sína hönd . Stefán segir ungu skákmennina himinlifandi yfir hversu vel söfnunin hefur gengið og þeim fjölda sem hefur lagt leið sína í Ráðhúsið. „Það verður teflt til sex í dag og von á góðum gestum. Síðan verður kaka hér á eftir, sem stendur á „við erum ein fjölskylda", stór og bragðgóð kaka sem gestum og gangandi verður boðið upp á, ásamt skákinni, þannig að það er bara stemning í gangi."

Fyrir þá sem vilja styrkja málefnið, en kjósa að koma ekki nálægt taflborðinu geta hringt í söfnunarsímann 904-1500. Með hverju símtali safnast 1500 krónur en sú upphæð gerir Rauða Krossinum kleift að kaupa mat til að hjúkra einu barni til heilbrigðis. Fimmhundruð manns hringdu í gær en alls hafa yfir níuþúsund manns gefið í söfnunina með þessum hætti. Þannig hafa safnast yfir tuttugu milljónir króna, en auk þess hefur Rauði krossinn lagt 4,3 milljónir úr neyðarsjóði í söfnunina. Utanríkisráðuneytið lagði svo sitt af mörkum í gær og lagði Rauða krossinum til 4,3 milljónir.