Kanna hvort hægt sé að lyfta rútunni með belgjum

Kannað verður hvort hægt sé að lyfta tékkneskri rútu af botni Blautulóna með loftbelgjum, og draga hana svo að landi, en þar hefur hún verið á bóla kafi síðan á föstudag.

Leiðangur á vegum Köfunarþjónustunnar lagði upp frá Reykjavík í morgun með ýmsan björgunarbúnað og mun hann kanna aðstæður síðdegis, en Blautulón eru um tíu kílómetra norður af fjallabaksleið nyrðri.

Lögð verður áhersla á að hlífa gróðri á svæðinu eins og hægt er og því þykja loftbelgirnir, eða púðarnir, vel koma til greina. Farþegarnir 22 og bílstjórinn, sem er Tékki, gistu á Vík í nótt, aðra nóttiona í röð og ætla líklega að sjá til í hvaða ástandi rútan verður þegar hún kemst á þurrt.

Bergvatn er í Blautulónum en ekki jökulvatn, þannig að hugsanlega hafa orðið litlar eða engar skemmdir á vélbúnaði. Brýnt er að ná bílnum upp sem fyrst því töluvert af dísilolíu er í geymum hans. Ekki liggur endanlega fyrir hver muni greiða kostnað við björgunina.