Úrúgvæ mætir Argentínu í 8-liða úrslitum

Úrúgvæ vann 1-0 sigur á Mexíkó í Suður-Ameríkukeppninni í knattspyrnu í gærkvöldi og tryggði sér annað sætið í C-riðli. Chile vann dramatískan sigur á Perú í sama riðli svo ljóst er að Argentína og Úrúgvæ mætast í átta liða úrslitum.

Alvaro Pereira var hetja Úrúgvæ í sigurleiknum gegn Mexíkó. Hann skoraði sigurmarkið eftir stundarfjórðung. Þrátt fyrir ágætisfæri tókst Úrúgvæ ekki að bæta við. Reyndar héldu áhorfendur að vængbrotið lið Mexíkó hefði jafnað metin mínútu fyrir leikslok en markið var dæmt af vegna rangstöðu.

Chile geymdi gulldrenginn Alexis Sanchez á bekknum fram í seinni hálfleik gegn Perú. Leikurinn var þrælskemmtilegur og bæði lið fengu fín færi. Eftir á að hyggja voru færi Perúmanna ekki síðri. Sigurmarkið kom undir lok leiksins, afar klaufalegt sjálfsmark eftir hornspyrnu. Bæði lið luku leik með tíu menn á vellinum eftir að Jean Beausejour hjá Chile og Giancarlo Carmona hjá Perú sáu rautt fyrir smávægileg handalögmál.

„Ég óska Chile til hamingju, Claudio Borghi og leikmönnunum,“ sagði Sergio Markarian þjálfari Perú. „Að mínu mati og með fullri virðingu fyrir öðrum þátttakendum hefur Chile spilað bestu knattspyrnuna í riðlakeppninni.“

Enn er óvíst hverjum Chile og Perú mæta í næstu umferð. Það kemur í ljós í kvöld þegar keppni í B-riðli lýkur. Paragvæ og Venesúela mætast í fyrri leik kvöldsins klukkan 22.05 á Stöð 2 Sport 2. Í síðari leiknum kl 00:35 mætast svo Brasilía og Ekvador.

Argentína og Úrúgvæ eru sigursælustu þjóðirnar í sögu keppninnar. Bæði lið hafa þó átt erfitt uppdráttar framan af móti en stigu upp þegar á þurfti að halda í lokaleik riðils síns.