Carlos Tevez klúðraði víti og Úrúgvæ komst í undanúrslit Copa America

Úrúgvæ komst í gær í undanúrslit Copa America eftir að hafa unnið Argentínu í vítaspyrnukeppni. Diego Perez skoraði fyrir Úrúgvæ á 6. mínútu en Gonzalo Higuain jafnaði metin fyrir Argentínu skömmu síðar. Bæði lið misstu mann af leikvelli vegna rauðra spjalda en leikurinn var frekar harður og hart barist.  

Fyrri hálfleikurinn var bráðskemmtilegur þar sem Úrúgvæ komst yfir snemma leiks eftir aukaspyrnu frá Diego Forlan en þetta er fyrsta markið sem Perez skorar fyrir A-landslið Úrúgvæ.  Lionel Messi var aðalmaðurinn á bak við jöfnunarmark Argentínu. Hann lék á varnarmann Úrúgvæ á hægri kantinum og vippaði síðan boltanum yfir varnarlínuna þar sem Higuain var mættur og skallaði boltann í netið af stuttu færi.

Higuain skoraði á ný 12 mínútum síðar en það mark var dæmt af vegna rangstöðu.

Perez var rekinn af leikvelli hjá Úrúgvæ sjö mínútum fyrir lok fyrri hálfleiks, þar sem hann fékk sitt annað gula spjald.  Javier Mascherano, fyrirliði Argentínu, fékk einnig sitt annað gula spjald í síðari hálfleik og fékk hann það rauða í kjölfarið.

Ekkert mark var skorað í framlengingunni og úrslitin réðust því í vítaspyrnukeppni. Bæði liðin skoruðu úr fyrstu tveimur vítaspyrnunum.  Varamaðurinn Carlos Tevez tók þriðju vítaspyrnuna fyrir Argentínu og hann lét Muslera verja frá sér. Úrúgvæ skoraði úr öllum sínum spyrnum og Caceres tryggði sigurinn úr fimmtu spyrnunni.