Fimm þúsund króna sekt fyrir að horfa á fótboltaleik í Fossvoginum

Fjöldi manns þurfti að greiða 5000 króna aukagjald fyrir að sækja fótboltaleik Víkings og Fram sem fram fór í Víkingsheimilinu í gærkvöld, þar sem lögreglan sektaði alla þá sem tóku til þess ráðs að leggja bílum sínum upp á grasfleti í nágrenni heimilisins. Framarinn Pálmi Bergmann segir þetta dónaskap og þröngsýni.

„Bílarnir eru ekkert fyrir, það er enginn að leggja uppi á gangstétt eða neitt svoleiðis, en þeir sem lögðu á götunni, þeir sluppu, því það stendur hvergi að það sé bannað að leggja á götunni. Það er hinsvegar bannað samkvæmt einhverjum lögum að leggja á grasi." segir Pálmi.

Þegar hann ræddi við lögreglumann sem var á svæðinu benti hann Pálma á að hægt væri að leggja við Grillhúsið á Sprengisandi, en hann segist efast um að eigendur Grillhússins yrðu ánægðir ef stæði veitingastaðarins fylltust af bifreiðum vallargesta.

„Fólk var mjög reitt þegar það kom af vellinum, sérstaklega liðið sem tapaði. Þeir voru ekki par ánægðir að fá 5000 kall ofan á allt hitt." segir Pálmi, en þess ber að geta að Fram vann leikinn með einu marki gegn engu.

Við Víkingsheimilið eru tæp 80 bílastæði en rúmlega 1500 áhorfendur sóttu leikinn í gær.