Sektanir lögreglu jaðra við einelti

„Mér finnst þetta jaðra við einelti orðið, þeir eru hérna allar stundir þegar eitthvað er um að vera hjá okkur:" segir Haraldur Haraldsson, framkvæmdastjóri knattspyrnufélagsins Víkings, um sektanir lögreglu á bílum sem lagt hafa á grasblettum fyrir utan heimilið.

Haraldur telur að frá upphafi leikja í úrvalsdeild karla í knattspyrnu í vor hafi lögreglan mætt á hvern einasta leik.

Áhorfendum á leikjum í Víkingsheimilinu hefur að sögn Haralds fækkað frá því lögreglan fór að venja komu sína á leikina og það hafi óhjákvæmilega áhrif á fjárhagsstöðu félagsins. „Bílastæðasjóður fær meiri innkomu af leikjunum en íþróttafélögin."

Reykjavíkurborg mun skapa sextíu ný bílastæði við Víkingsheimilið í haust en Haraldur segir að það muni ekki koma til með að leysa þau vandamál sem verða við íþróttaheimilið þegar eitthvað er um að vera.