Þær japönsku hafa nú sett stefnuna á Ólympíugullið

Homare Sawa, fyrirliði Heimsmeistara Japans í kvennafótbolta, var yfirlýsingaglöð á blaðamannafundi í Tókýó þegar japanska landsliðið snéri heim eftir sigurinn á HM í Þýskalandi. Sawa segir að nú ætli liðið sér að vinna gullið á Ólympíuleikunum í London á næsta ári.

Homare Sawa kom heim til Japans hlaðin gulli því hún tók við heimsbikarnum, bikarnum fyrir að prúðasta liðið, fékk gullskóinn sem markahæsti leikmaður keppninnar og gullboltann fyrir að vera kosin besti leikmaðurinn.

„Það er bara mannlegt eðli að vilja meira," sagði Homare Sawa í viðtali við blaðamenn á flugvellinum í Tókýó en hún var þá að sjálfsögðu með gullmedalíuna sína um hálsinn. 250 blaðamenn voru mættir til þess að fá viðbrögð frá hetjunum.

„Þegar ég er með þessa gullmedalíu um hálsinn þá er það mín tilfinning að næsta markmið þess liðs sé að reyna að vinna Ólympíugullið. Við eigum nefnilega enn eftir að vinna verðlaun á Ólympíuleikum," sagði Homare Sawa en japanska landsliðið endaði í fjórða sæti á síðustu Ólympíuleikum.