Enn dettur England út eftir vítaspyrnukeppni

Frakkar eru komnir í undanúrslit á HM kvenna í knattspyrnu í Þýskalandi. Liðið lagði England í fyrsta leik 8-liða úrslitanna í dag eftir vítaspyrnukeppni. Englendingar voru þremur mínútum frá sigri í venjulegum leiktíma.

Englendingar komust yfir á 58. mínútu með marki Jill Scott. Hún lét vaða fyrir utan teig og boltinn sigldi yfir markvörð Frakka sem var illa staðsettur. Fyrirfram voru Frakkar taldir sigurstranglegri í viðureigninni og staðan óvænt. Frakkar sóttu og sóttu í kjölfarið og þremur mínútum fyrir leikslok skilaði það árangri. Þá skoraði Élise Bussaglia stórkostlegt mark með skoti upp í vinkilinn og allt í járnum.

Í framlengingunni var ekkert skorað og því þurfti að grípa til vítaspyrnukeppni. Frakkar brenndu af sinni fyrstu spyrnu og útlitið gott fyrir Englendinga. Ensku stelpunum brást hins vegar bogalistin í tvígang og franskur sigur staðreynd.

Það á ekki af Englendingum að ganga í vítaspyrnukeppnum á stórmótum. Karlalandslið Englands datt út úr keppni eftir vítaspyrnukeppni á HM 1990, EM 1996, HM 1998, EM 2004 og HM 2006.