Gylfi Þór: Samheldnin í hópnum mikil

Gylfi Þór Sigurðsson, leikmaður U-21 liðs Íslands, segir að það hefði verið samheldni og vinátta leikmanna liðsins sem gerði það að verkum að liðið náði sér á strik í lokaleik sínum á EM í Danmörku.

Ísland vann í gær 3-1 sigur á Danmörku í A-riðli keppninnar en það dugði ekki til að komast áfram í undanúrslitin. Danir komust ekki heldur áfram, heldur Hvít-Rússar og Svisslendingar. Ísland tapaði fyrir báðum þeim liðum í keppninni.

„Þetta er mjög svekkjandi, sérstaklega þar sem við spiluðum mjög illa í fyrstu tveimur leikjunum. En svo áttum við smá séns fyrir þennan leik og náðum við að koma okkur í það góða stöðu að við áttum von síðustu 30 mínúturnar,“ sagði Gylfi en viðtalið má sjá í heild sinni hér fyrir ofan.

„Bæði lið fengu færi eftir þetta en Halli hélt okkur vel í leiknum. Það er grátlegt að það hafi á endanum vantað bara eitt mark til viðbótar.“

Gylfi sagði eftir leikinn gegn Sviss á þriðjudagskvöldið að frammistaða bæði hans og liðsins hefðu valdið honum vonbrigðum. En liðið náði að snúa mótlætinu sér í hag.

„Ég held að það hafi helst verið vegna þess að við erum allir góðir vinir og allir saman í þessu. Samheldnin er mikil í liðinu. Við vissum að við værum betri en við gáfum til kynna í síðustu leikjum. Við settumst því niður, töluðum saman og ræddum um hvað við þyrftum að bæta. Við gerðum það hér í dag.“

Leikmenn íslenska liðsins fengu lítinn afslátt frá dómara leiksins sem rak Eyjólf Sverrisson upp í stúku auk þess sem að margir dómar hans í leiknum voru afar einkennilegir.

„Ég fann það strax í leiknum að þetta yrði erfitt. Það mátti ekkert tala við dómarann og fékk ég til að mynda gult spjald fyrir að segja að maðurinn hafi verið sex metrum frá mér þegar ég tók aukaspyrnuna. Ég hefði því verið í banni í næsta leik og svo rak hann líka Jolla upp í stúku sem var frekar skrýtið.“

„En við fengum fullt af færum til að klára þetta í kvöld og getum við bara sjálfum okkur um kennt hvernig fór fyrir okkur.“

„Við erum þó ánægðir með að hafa snúið genginu við og sýnt hvað við getum í síðasta leiknum. En það er alltaf leiðinlegt að detta út og veit ég ekki hvort við göngum frá þessari keppni með höfuðið hátt - en þetta lagaðist alla vega í síðasta leiknum.“