Rúmt eitt tonn af ösku var í sundlauginni á Kirkjubæjarklaustri

Lítil ummerki eru um eldsumbrot í Grímsvötnum og líkur á að gosið sé að fjara út. Gosstrókurinn náði í um eins komma fimm kílómetra hæð í gær, en lítil aska var í honum. Hreinsunarstörfum á öskusvæðunum fer nú senn að ljúka en þar hefur fjöldi fólks unnið ötullega síðustu daga.

Það er allt annað að sjá Kirkjubæjarklaustur nú en þegar aska umlukti bæinn og nærsveitir hans fyrir nokkrum dögum.

Slökkviliðsmenn kláruðu að spúla af húsum og bæjum á öskusvæðinu í gær og var þörfin mikil líkt og sést á þessum myndum, en vatnið sem nýtt var til verksins skipti fleiri hundruðum tonna. Íbúar voru skiljanlega himinlifandi með útkomuna.

„Ég hef ekki séð þetta svona hreint lengi því ef það er ekki aska þá er það Skaftárleir og það er sitt lítið af hverju og Skeiðarársandur á flögri af og til þannig að það er fínt að fá svona sparihús," segir Ingibjörn Eiríksdóttir íbúi á Túngötu.

Sundlaugin á Kirkjubæjarklaustri hefur einnig verið tekin í gegn og skartar hún nú sínu fegursta. Verkefnið var þó ærið.

„Það þurfti fötur og skóflur og hjólbörur til að keyra það út. Ég held að það hafi verið rúmt tonn sem þeir mokuðu upp úr," segir Ólafur Ingi Jónsson, björgunarsveitarmaður.

Slökkviliðs- og björgunarsveitarmenn hafa verið mjög áberandi á svæðinu og hafa þeir aðstoðað fólk með allt frá þrifum til gangsetningu ökutækja.

„Þetta er svo ómetanlegt starf, við erum bara alveg afskaplega þakklát," segir Ragnheiður Hlín Símonardóttir.

Og íbúarnir eru ekki þeir einu sem eru þakklátir því slökkviliðið og björgunarsveitirnar fara fögrum orðum um fólkið á svæðinu.

Þá hefur fjöldi fólks tekið sig saman og gengið á bæi til þess að bjóða fram aðstoð sína, þeirra á meðal Atli Gíslason alþingismaður og eiginkona hans Rannveig Sigurðardóttir sem vilja frekar gera gagn með höndunum en ekki munninum.