Ekki sjálfgefið hvort Atli styðji tillögu um vantraust

"Það er ekki sjálfgefið að ég muni styðja þessa tillögu, segir Atli Gíslason, fyrrverandi þingmaður VG sem nú er utan þingflokka. Hann segist ekki hafa kynnt sér vantrauststillögu Bjarna Benediktssonar sem hann hyggst leggja fram í dag.

Atli segist þó ekki vilja útiloka neitt varðandi hvaða afstöðu hann taki til málsins. Lilja Mósesdóttir, sem yfirgaf þingflokk VG á sama tíma og Atli, er fjarverandi á þingi þar sem hún er stödd í útlöndum.

Sama er að segja um þá Birki Jón Jónsson varaformann Framsóknarflokksins og Sigmund Davíð Gunnlaugsson formann. Sigmundur mun vera staddur á Svalbarða samkvæmt heimildum fréttastofu.