Alfreð Þorsteinsson: Þetta var leikrit

Fyrrverandi stjórnarformaður Orkuveitunnar til margra ára kallar aðgerðir meirihlutans í borginni vegna Orkuveitunnar leikrit. Hann hafi skilið við fyrirtækið í góðum rekstri.

„Ég er dálítið undrandi yfir þessu leikriti. Það er dregin upp mjög dökk mynd af fyrirtækinu eins og það sé komið að fótum fram en það er fjarri lagi að Orkuveitan sé í jafn miklum vandræðum og sagt hefur verið," segir Alfreð Þorsteinsson fyrrverandi stjórnarformaður Orkuveitu Reykjavíkur en þeirri stöðu gengdi hann allt fram til ársins 2006. Hann segir yfirlýsingar stjórnar Orkuveitunnar lýðskrum - staðan hafi alls ekki verið jafn slæm og menn segja.

„Því hefur verið haldið fram á blaðamannafundi að erfitt væri að greiða fólki laun í byrjun vors án aðgerða. Það kom ekki fram að orkuveitan hefur óhreyfða lánalínu upp á 8 milljarða. Það er því fjarri lagi að orkuveitan sé í þeim erfiðelikum sem sagt er," segir Alfreð.

Bjarni Bjarnason, forstjóri Orkuveitu Reykjavíkur, sagði á blaðamannafundinum í gær að Orkuveitan hefði fyrir löngu misst sjónar af raunverulegu hlutverki og tilgangi sínum. Hann boðaði afturhvarf til fortíðar og einfaldari starfshátta:

„Menn hafa talað um völlinn á fyrirtækinu. Þegar þú lítur til baka, geturðu sagt að ekkert hafi verið að? Auðvitað má deila um það, en þegar ég yfirgaf fyrirtækið árið 2006 voru heildarskuldirnar undir 60 milljarðar sem voru langtímalán. Það sem gerist eftir er að menn eru ekki jafn varkárir, þeir eru að taka styttri lán," segir Alfreð.