Stefán Logi: Lærði það hjá Gumma Hreiðars að verja víti

Stefán Logi Magnússon fékk sitt fyrsta tækifæri í alvöru landsleik á Kýpur í kvöld og sá til þess öðrum fremur að íslenska liðið hélt marki sínu hreinu og náði í sitt fyrsta stig í undankeppni EM. Stefán Logi varði meðal annars vítaspyrnu á 21. mínútu leiksins og gerði það á glæsilegan hátt.

„Þetta er fyrsti alvöru leikurinn og það var virklega ánægjulegt að fá að spila hann. Ég lærði það hjá Gumma Hreiðars að verja víti," sagði Stefán Logi í léttum tón í í viðtali við Arnar Björnsson á Stöð 2 Sport eftir leik.

„Það var svolítið synd að við skyldum fá á okkur þetta víti því það kom smá stress í liðið og við náðum aldrei að spila þann leik sem við ætluðum að spila í fyrri hálfleik og þá sérstaklega ekki sóknarlega. Varnarlega stóðu strákarnir sig mjög vel og lögðu sig alla fram," sagði Stefán Logi.

„Við hefðum vissulega viljað náð í sigur hér í dag en það var þó ekki þannig að við værum að skapa bestu færin. Svona er þetta stundum en við erum allavegna komnir með stig. Við þurfum bara að horfa fram á veginn og vona að við tökum fleiri stig í þessarri keppni," sagði Stefán Logi.

Stefán Logi tókst að taka fyrirliða Kýpur, Michail Chrysostomos, á taugum í vítinu. „Það er nú alltaf þannig í vítum að stundum nærðu að verja og stundum ekki. Ég hef haft það orð á mér að vera hrokafullur en mér hefur yfirleitt gengið vel að verja víti og vonandi heldur það áfram," sagði Stefán Logi.

„Það var mjög ljúft að ná að taka víti í svona mikilvægum leik. Hvert stig telur þótt að við komust ekki áfram í þessarri keppni. Það var virkilega gaman að standa vaktina fyrir strákana þegar þeir þurftu á því að halda," sagði Stefán Logi sem ætlar að halda sæti sínu í byrjunarliðinu.

„Það er engin ástæða til þess að fara að gefa þetta sæti frá mér. Það er samt góð samkeppni í liðinu og góð samvinna á milli okkar markmannanna. Gulli hefur stutt við bakið á mér og það er enginn rígur á milli okkar. Það er bara þjálfarinn sem velur liðið en auðvitað vonast ég til þess að spila næsta leik því það er enn stærri leikur. Það vilja allir markverðir vera númer eitt en það er því miður bara ein staða í boði. Vonandi fæ ég að spila næst," sagði Stefán Logi að lokum.