Tuttugu unglingum undir aldri vísað heim

Nokkur erill var hjá lögreglunni á höfuðborgarsvæðinu í nótt. Hún hafði afskipti af tuttugu unglingum sem voru saman komnir á skemmtistaðnum Re-Play á Grensásvegi í gærkvöldi. Þeir reyndust allir vera undir lögaldri og var komið til síns heima.

Lögreglan þurfti að hafa afskipti af tveimur líkamsárásum, annarri í miðbænum og hinni í Grafarvogi. Þær voru báðar minniháttar.

Þá komu upp átta minniháttar fíkniefnamál vítt og breitt á skemmtistöðum í borginni. Samkvæmt upplýsingum frá varðstjóra var um lítið magn efna að ræða hverju sinni.

Einn ökumaður var tekinn grunaður um ölvun við akstur.