Útskrifaður af gjörgæslu í dag

Annar mannanna sem bjargað var af sökkvandi báti rétt norðan við Akurey á sundunum við Reykjavík á sjötta tímanum í gær verður útskrifaður af gjörgæsludeild í dag. Líðan hans er góð samkvæmt upplýsingum frá vakthafandi lækni.

Björgunarsveitir á höfuðborgarsvæðinu björguðu tveimur mönnum af bátnum í gær. Samkvæmt upplýsingum frá Slysavarnafélaginu Landsbjörgu barst beiðni um aðstoð um klukkan fimm og voru þá björgunarskip og bátar félagsins send á staðinn. Tuttugu mínútum síðar voru skipbrotsmennirnir komnir um borð í björgunarskip og maraði báturinn í hálfu kafi og aðeins stefnið stóð uppúr. Mennirnir höfðu þá verið í sjónum í nokkrar mínútur og voru annar þeirra nokkuð kaldur.