Skorið niður hjá Vinnuskólanum

Nokkrar breytingar verða gerðar hjá Vinnuskóla Reykjavíkur vegna hagræðingar. Búist er við að rúmlega tvö þúsund ungmenni skrái sig í Vinnuskólann í sumar en skráning hefst snemma í aprílmánuði. Skólinn þarf að forgangsraða upp á nýtt fyrir sumarið og felur það meðal annars í sér að svokölluð Græn heimaþjónusta fellur niður.   Græn heimaþjónusta fólst í því að eldri borgarar og öryrkjar gátu sótt um þá þjónustu hjá Reykjavíkurborg að láta nemendur Vinnuskólans hreinsa garða sína.

„Við þurfum á öllum okkar nemendum að halda til að sinna grænu svæðunum í borginni," segir Magnús Arnar Sveinbjörnsson skólastjóri Vinnuskóla Reykjavíkur.  

Vinnuskólinn getur ekki boðið nemendum úr 8. bekk grunnskóla vinnu að þessu sinni eins og fram kom við gerð fjárhagsáætlunar Reykjavíkurborgar á liðnu ári.

Síðastliðið sumar stóð nemendum í áttunda bekk til boða hálfsdags vinna í þrjár vikur. Þá verður stytting á vinnutíma nemenda í 9. og 10. bekk í sumar og munu þeir starfa í þrjár vikur á sex vikna tímabili í stað fjögurra vikna. 9. bekkur vinnur hálfan daginn og 10. bekkur allan daginn.   

Vinnuskóli Reykjavíkur er Grænfánaskóli og fá nemendur áfram fræðslu í umhverfismálum líkt og undanfarin sumur.

Áttatíu eru í atvinnutengdu námi í vetur á vegum Vinnuskólans, flestur úr 10. bekk grunnskólans. Markmið atvinnutengda námsins er að mæta þörfum nemenda sem þurfa að hvíla sig á skólastarfinu.

„Að öllu jöfnu er þetta flottir krakkar sem eiga skilið að fá tækifæri til þess að sanna sig á öðrum vettvangi en í skóla og þess vegna býðst þeim að sækja vinnu nokkra tíma á viku á skólatíma," segir Helga Bryndís Kristjánsdóttir verkefnisstjóri.