Sex ölvaðir undir stýri í Reykjavík - einn á Akureyri

Nokkrir gistu fangageymslur sökum ölvunar á lögreglustöðinni við Hverfisgötu í Reykjavík. Sjötíu verkefni komu inn á borð lögreglunnar á höfuðborgarsvæðinu í nótt, flest smáverkefni en sex ökumenn voru teknir grunaðir um ölvun við akstur.

Þá gisti einn fangageymslur á Akureyri vegna ofurölvunar í nótt, en að öðru leyti var nóttin róleg á Norðurlandi. Þar var lítið af fólki á ferðinni að sögn lögreglu, enda gekk á með hríðarbyljum frameftir nóttu. Þrjú minniháttar umferðarslys urðu síðdegis í gær í bænum, og mátti rekja þau öll til hálku og vondrar færðar.