Styttist í að efnahagsbrotadeildir verði sameinaðar

Gerð frumvarps um sameiningu efnahagsbrotadeildar Ríkislögreglustjóra og Sérstaks saksóknara er á lokastigi í innanríkisráðuneytinu, segir Halla Gunnarsdóttir, aðstoðarmaður ráðherra. Hún segist ekki geta upplýst um það núna hvenær sameiningin mun taka gildi. Þó hefur verið rætt um mitt næsta ár í þessu samhengi.

Búast má við því að þessi mál verði til umræðu á fundi Ríkissaksóknara og Ákærendafélagsins með ákærendum og fulltrúum þeirra sem sinna sakamálum sem haldinn er á morgun.

Á fundinum munu Ólafur Þ. Hauksson, sérstakur saksóknari, og Helgi Magnús Gunnarsson, sem er saksóknari efnahagsbrotadeildar Ríkislögreglustjóra, halda erindi. Helgi Magnús er sem kunnugt er í leyfi frá efnahagsbrotadeildinni á meðan hann sinnir störfum fyrir embætti Saksóknara Alþingis.