Erfitt að þola einelti

Nítján ára einhverf stúlka segir erfitt að vera ávallt fórnarlamb eineltis. Bíll stúlkunnar var skemmdur í gær og eru sökudólgarnir enn ófundnir.

Sunna Björk er nítján ára gömul og er með einhverfu. Í gær sögðum við frá því að skemmdarverk höfðu verið unnin á bíl hennar, ljós brotin og eggjum kastað í hann. Við hittum Sunnu Björk og móður hennar á kaffihúsi út á Granda - skammt frá vinnustað hennar.

„Þetta er náttúrlega bara einelti þannig séð. En það er vonandi að sökudólgurinn finnist," segir móðir Sunnu Bjarkar. „Ég var náttúrlega bara í sjokki og leið ekkert vel - það er bara hræðilegt að fólk geri svona - ég var næstum því búin að tárast," segir Sunna Björk sjálf.

Sunna Björk hefur einu sinni þurft að skipta um skóla vegna eineltis. Þrautaganga, segir móðir hennar. En Sunna Björk er þakkát fyrir stuðning móðurinnar.

Þrátt fyrir erfiða daga sér Sunna Björk líka það jákvæða í lífinu. Hana dreymir um að verða rithöfundur og skrifa ævintýri um hetjur og skúrka.

Sunna segir að mjög margir séu búnir að hringja í dag og bjóðast til að laga laga bílinn ókeypis. Hún þakkar því fólki kærlega fyrir. „Það er frábært að það er til svona fólk í heiminum," segir Sunna.