Skóladótinu stolið frá verðandi klæðskera

Fanney Lilja Hjálmarsdóttir, nemi í klæðskera og kjólasaum við Iðnskólann í Reykjavík, varð fyrir því óláni að brotist var inn í bílinn hennar og skóladótinu hennar stolið. „Þetta var svakalegt sjokk," segir Fanney.

Bíllinn hennar stóð á bílastæði Iðnskólans þegar brotist var inn í hann, milli klukkan 18 og 18.30 á mánudagskvöldið. Fanney var þá á kaffihúsi með bekkjarsystrum sínum eftir langan skóladag.

Henni brá mjög þegar hún kom aftur að bílnum og sá að skóladótið var horfið, þar á meðal teikningar sem hún hafði unnið að síðasta mánuðinn og var að fara að skila inn sem heimaverkefni.

Fanney er á sjöttu önn í klæðskera og kjólasaumi og hefur allt námið safnað að sér hinum ýmsu verkfærum sem nauðsynleg eru hverjum klæðskera, svo sem góðum skærum, reglustiku og nálum. „Þetta er dýr pakki þegar þarf að kaupa þetta allt í einu. Ég hef keypt þetta smátt og smátt, segir Fanney.

Tveimur töskum var stolið frá Fanneyju, skjalatösku með teikningum og skólatösku með verkfærunum. Þjófurinn sá hins vegar ekki ástæðu til að halda í teikningarnar því hann fleygði þeim við Austurbæjarskóla og var þeim komið til skila í Iðnskólann.

„Ég var alveg ofboðslega fegin að fá þær aftur," segir Fanney en auk heimavinnunnar voru þar teikningar sem Fanney hefur unnið að frá upphafi námsins.

Fanney hafði strax samband við lögreglu eftir að hún var rænd. Lögreglumenn komu á staðinn og tóku skýrslu en hún segir að henni hafi ekki verið gefnar miklar vonir um að eigur hennar kæmu í leitirnar.

Amma Fanneyjar tók þjófnaðinn mjög nærri sér og biðlaði hún til Vísis um að greina frá málinu í von um að þjófurinn skili skóladótinu.

Fanney er 21 árs gömul og hafði lokið hönnunarnámi áður en hún fór að læra kjólasaum. „Mig langaði bara að geta gert þetta allt sjálf," segir hún.

Þjófurinn, eða aðrir sem geta veitt upplýsingar um eigur Fanneyjar, eru hvattir til að hafasamband við hana. Póstfangið er flilja89(hjá)gmail.com