Lést í gufunni í World Class - fannst daginn eftir

Karlmaður fannst látinn í gufubaði World Class á miðvikudaginn en maðurinn lést skyndidauða samkvæmt upplýsingum frá lögreglunni á höfuðborgarsvæðinu. Bráðabirgðaniðurstöður krufningar liggja fyrir en þær staðfesta að andlát mannsins hafi ekki borið að með saknæmum hætti.

Maðurinn var næturlangt í gufuklefanum en líkamsræktarstöðin lokar klukkan hálf tólf á kvöldin og opnar sex morguninn eftir.

Það var DV sem greindi fyrst frá málinu en þar er rætt við Friðrik Smára Björgvinsson, yfirlögregluþjón rannsóknardeildar.

Aðspurður hvort ekki væri óeðlilegt að lík mannsins hafi legið óafskipt yfir nótt í gufuklefanum sagði Friðrik við DV að það hafi engu breytt varðandi andlátið. „Og snerti rannsóknina ekkert sem slíka."

Lögreglan vildi ekki gefa upp aldur mannsins.