Atli Sveinn framlengir við Val

Knattspyrnumaðurinn Atli Sveinn Þórarinsson hefur framlengt samning sinn við Val um eitt ár. Samningur hans við Val átti að renna út í haust eftir keppnistímabilið í Pepsi-deildinni en hefur nú framlengt til haustsins 2012. Frá þessu er greint á heimasíðu Vals í dag.

Atli Sveinn er 31 árs varnarmaður og hefur leikið með Val undanfarin sjö ár. Hann hefur leikið 131 leik með Val í deild og bikar og skorað átta mörk.

Atli kom frá KA til Vals árið 2004 og á einnig níu landsleiki að baki fyrir A-landslið Íslands.