Vill að ríkið sendi skýr skilaboð og afnemi ábyrgð á innistæðum

Forseti ASÍ vill að stjórnvöld sendi bönkunum skýr skilaboð vegna ofurlauna og afnemi ríkisábyrgð á innistæðum. Forsætisráðherra segir framferði bankastjóra Arion banka og Íslandsbanka óþolandi ögrun og beina ógn við stöðugleika og frið í samfélaginu.

Laun bankastjóra Arion banka hækkuðu um fjörutíu prósent milli ára, en Höskuldur Ólafsson, bankastjóri Arion banka, fékk 4,3 milljónir króna á mánuði í laun í fyrra. Það eru næstum fjórföld laun forsætisráðherra. Þá hækkuðu laun Birnu Einarsdóttur, bankastjóra Íslandsbanka um þriðjung, en ríkið heldur á eignarhlut í báðum bönkum, 5 prósenta hlut í Íslandsbanka og 13 prósenta hlut í Arion banka.

Jóhanna Sigurðardóttir, forsætisráðherra, tjáði sig um þetta á Facebook-síðu sinni í dag en þar segir hún að engin siðleg réttlæting sé á ofurlaunum sem stjórnendur Arion banka og Íslandsbanka hafi fengið á liðnu ári. Þá segir hún að framferði þeirra sé óþolandi ögrun og bein ógn við stöðugleika og frið í samfélaginu.

Steingrímur líka undrandi

Steingrímur J. Sigfússon furðar sig einnig á þessum tíðindum. „Ég er jafn undrandi og aðrir að menn skuli fara svona bratt í hlutina. Ég hélt nú að menn myndu stíga varlega til jarðar í ljósi reynslunnar því ekki reyndust ofurlaunin á sínum tíma nein trygging fyrir því að bankareksturinn væri góður eða hefði farsælan endi," segir Steingrímur.

Gylfi Arnbjörnsson forseti ASÍ vill að stjórnvöld fylgi þessum orðum eftir með aðgerðum. „Þetta er á alla mælikvarða móðgun við fólkið í landinu að gera svona. Eftir það mikla hrun sem hér varð sem hefur leitt til þess að almenningur hefur misst allt sitt eigið fé, þá er þetta eiginlega móðgun við alla í landinu og eitthvað sem á að heyra sögunni til," segir Gylfi.

Vill reglur um laun og bónusa

Gylfi telur eðlilegt að settar verði reglur um launakjör og bónusa í bönkunum og ábyrgðir felldar niður fari menn á svig við þær. „Það kom í ljós í bankahruninu að þetta er ekkert einkamál bankanna eða eigenda þeirra. Þjóðin er í ábyrgð fyrir þessu og reyndar í dag er ríkið með beina ábyrgð á öllum innistæðum bankanna og mér fyndist það eðlilegt að stjórnvöld myndu svara með svona ákvörðunum með því að fella niður slíka ábyrgð gagnvart bönkunum og þeir þyrftu þá að horfast í augu við sinn veruleika án ríkisábyrgða."thorbjorn@stod2.is